మరోసారి ముందస్తు ఎన్నికలకు కేసీఆర్-ఎప్పుడంటే..?

టీపీసీసీ అద్యక్షుడికి టీడీపీ వాసన పోలేదని మంత్రి కేటీఆర్ చేసిన కామెంట్స్ తనదైన శైలిలో కౌంటర్ ఇచ్చారు రేవంత్. తాను టీడీపీ వచ్చానని కేటీఆర్ నటున్నారని మరి, కేసీఆర్ ఎక్కడి నుంచి వచ్చాడని ప్రశ్నించారు. కేసీఆర్ కేబినేట్ ఉన్న అత్యధిక శాతం మంత్రులు టీడీపీకి చెందిన వారేనని చెప్పారు. టీఆర్ఎస్ చేసిన ఉద్యమాల ఫలితంగానే తెలంగాణ కాంగ్రెస్ అనే ప్రత్యేక శాఖ ఏర్పడిందని..అది కేసీఆర్ భిక్ష అని మాట్లాడుతున్న కేటీఆర్…హరీష్ లు వాస్తవాలను గమనించాలని సూచించారు. హరీష్‌రావు, కేటీఆర్‌ కు రాజకీయ బిక్ష పెట్టింది కాంగ్రెస్, టీడీపీ కాదా..? తెలంగాణ కాంగ్రెస్ టీడీపీ అయితే.. టీఆర్ఎస్‌ కూడా టీడీపీనేగా అని కౌంటర్ ఇచ్చారు రేవంత్. అదే సమయంలో సంచలన వ్యాఖ్యలు చేశారు ఆయన. మరోసారి కేసీఆర్ ముందస్తు ఎన్నికలకు వెళ్ళే అవకాశం ఉందని చెప్పారు. వచ్చే ఏడాది ఆగస్టు 15 తర్వాత కేసీఆర్‌ తన ప్రభుత్వాన్ని రద్దు చేసే అవకాశాలు ఉన్నాయని అంచనా వేశారు. అంతేకాదు కేటీఆర్‌ సీఎం కాలేడని.. అసలు కేసీఆరే కానివ్వడని విమర్శించారు. వచ్చే ఎన్నికల్లో కాంగ్రెస్ 72 సీట్లు సాధించి..అధికారంలోకి రావడం ఖాయమని ఆయన ధీమా వ్యక్తం చేశారు.