తమిళనాడులో 14 రోజుల పాటు సంపూర్ణ లాక్‌డౌన్‌

కరోనా వ్యాప్తికి అడ్డుకట్ట వేసేందుకు తమిళనాడులో నూతనంగా ఎన్నికైన డిఎంకె అధినేత స్టాలిన్‌ నేతృత్వంలోని ప్రభుత్వం కీలక నిర్ణయం తీసుకుంది. మే 10నుండి మే24 వరకు అంటే 14 రోజుల పాటు సంపూర్ణ లాక్‌డౌన్‌ను విధించింది. రాష్ట్రంలో కరోనా కేసులు పెరుగుతున్న నేపథ్యంలో అనివార్యమైన పరిస్థితుల కారణంగా షట్‌డౌన్‌ తప్పదని ప్రభుత్వం తెలిపింది. ఈ లాక్‌డౌన్‌ సమయంలో కూరగాయలు, మాంసం, చేపల దుకాణాలు, నిత్యావసర సరుకుల దుకాణాలు మధ్యాహ్నం 12 గంటల వరకు తెరిచే అవకాశాన్ని ఇచ్చింది. మిగిలిన దుకాణాలు పూర్తి స్థాయిలో మూసివేయాలని ఆదేశించింది. రాష్ట్ర ప్రభుత్వ ఆధ్వర్యంలో నడుస్తున్న మద్యం షాపులు, బార్లు సైతం పూర్తిగా మూసివేస్తున్నట్లు తెలిపింది. రెస్టారెంట్లకు కేవలం భోజనం తీసుకువెళ్లే సదుపాయాలకు మాత్రమే అనుమతినిచ్చింది. నిత్యావసర సేవలతో పాటు పెట్రోల్‌ బంకులు మాత్రమే పూర్తి స్థాయిలో పనిచేస్తాయని చెప్పింది. సంపూర్ణ లాక్‌డౌన్‌ విధిస్తున్న నేపథ్యంలో ఈ శని, ఆదివారాల్లో అన్ని దుకాణాలను ఉదయం 6 గంటల నుండి 9 గంటల వరకు తెరచి వుంచనున్నట్లు తెలిపింది.