వుహాన్ ల్యాబ్‌లో కరోనా-శాస్త్రవేత్తల బృందం క్లారిటీ

ప్రపంచాన్ని వణికిస్తోన్న కరోనా మహమ్మారి చైనాలోని వూహన్ ల్యాబ్ లో పుట్టిందని అంతర్జాతీయంగా ఆరోపణలు వచ్చాయి. ముమ్మాటికీ కరోనాను పుట్టించింది చైనానేనని పలు దేశాలు ఆరోపించాయి. ఈ నేపథ్యంలో అంతర్జాతీయ శాస్త్రవేత్తల బృందం ఓ క్లారిటీ ఇచ్చింది. కరోనా వైరస్ చైనాలోని వుహాన్ ల్యాబ్‌లో పురుడుపోసుకుందని చెప్పేందుకు ఎలాంటి ఆధారాలు లేవని స్పష్టం చేసింది అంతర్జాతీయ శాస్త్రవేత్తల బృందం. ఆస్ట్రేలియాలోని సిడ్నీ విశ్వవిద్యాలయం, బ్రిటన్‌లోని ఎడిన్‌బరో యూనివర్సిటీ, అమెరికాలోని కాలిఫోర్నియా యూనివర్సిటీ, చైనాలోని జియావోటాంగ్-లివర్‌పూర్ యూనివర్సిటీలతో కలసి ప్రపంచవ్యాప్తంగా పలు యూనివర్సిటీలు, పరిశోధక సంస్థలకు చెందిన 21 మంది శాస్త్రవేత్తలు కరోనాపై ఇప్పటి వరకు లభించిన శాస్త్రీయ ఆధారాలను పరిశీలించి…కరోనా వుహాన్ ల్యాబ్‌లో పురుడుపోసుకుందని చెప్పేందుకు ఎలాంటి ఆధారాలు లేవని స్పష్టం చేసింది. కొసమెరపు ఏంటంటే..ల్యాబ్‌లో అనుకోకుండా ఇది పుట్టి ఉండొచ్చన్న వాదనను కూడా కొట్టిపడేయలేమని పేర్కొన్నారు. అయితే, ల్యాబ్ నుంచే అది లీకైందని చెప్పే ఆధారాలు కూడా లేవన్నారు. సార్స్-కోవ్-2 వైరస్ జంతువుల నుంచి మనుషులలోకి ప్రవేశించిందన్న వాదనకు బలం చేకూర్చే ఆధారాలు ఉన్నాయని చెప్పింది.