పక్కా ప్లాన్ తో రేవంత్-త్వరలోనే పాదయాత్ర

రేవంత్ రెడ్డికి తెలంగాణ పీసీసీ పగ్గాలు అందివ్వడంతో.. కాంగ్రెస్ పార్టీని బలోపేతం చేసేందుకు ఆయన ప్రణాళికలు రూపొందిస్తున్నారు. ఓ వైపు పార్టీకి పూర్వ వైభవం తీసుకువస్తూనే..మరో వైపు కాంగ్రెస్ ని తిరిగి అధికారంలోకి తీసుకువచ్చేందుకు వ్యూహా రచన చేస్తోంది రేవంత్ టీం. త్వరలో సుదీర్ఘ పాదయాత్ర చేయబోతున్నట్టు ఆయన శిబిరంలోని నేతలు అంటున్నారు. తెలంగాణ ప్రజల్లో నమ్మకాన్ని కల్గించేలా ఆయన పాదయాత్ర చేయనున్నట్టు తెలుస్తోంది. దీనిపై మరో పది రోజుల్లో స్పష్టమైన ప్రకటన విడుదలయ్యే అవకాశం ఉంది. సాధ్యమైనంత త్వరలో పాదయాత్ర చేపట్టి.. ప్రజల్లోకి వెళ్లాలనుకుంటున్నారు. రూట్ మ్యాప్ కూడా వెలువడే అవకాశం ఉంది. దీని వెనక మరోకారణం కూడా ఉంది. బీజేపీ రాష్ట్ర అధ్యక్షుడు బండి సంజయ్ కూడా పాదయాత్ర చేపడతారన్న వార్తల నేపథ్యంలో ముందుగానే రంగంలోకి దిగుతున్నారు రేవంత్. తెలంగాణలోని 33 జిల్లాలను మొత్తం చుట్టేలా పాదయాత్రకు ప్లాన్ చేస్తున్నారు. పక్కా ప్రణాళికతో.. సుదీర్ఘ పాదయాత్ర చేయాలన్నది రేవంత్ సంకల్పం. రేవంత్ తన పాదయాత్రను అలంపూర్ నుంచి ఆదిలాబాద్ వరకు చేయనున్నట్టు సమాచారం. తన పాదయాత్రలో కాంగ్రెస్ పార్టీని రాష్ట్రంలో ప్రత్యామ్నాయంగా నిలబెట్టే ప్రయత్నం చేస్తున్నారు.