కోలీవుడ్‌ సినీ పరిశ్రమను వరుసగా తీవ్ర విషాదాలు వెంటాడుతున్నాయి. హాస్య నటుడు వివేక్‌, ప్రముఖ క్యారెక్టర్‌ ఆర్టిస్ట్‌ మారన్‌, దర్శకుడు కెవి ఆనంద్‌ వంటి ఇటీవల మరణించారు. తాజాగా మరో ప్రముఖ నటుడు, రచయిత, నిర్మాత వెంకట్‌ సుభా శనివారం కరోనాతో మృతి చెందారు. ఈ విషయాన్ని ఆయన స్నేహితుడు, ప్రొడ్యూసర్‌ టి. శివ ట్విట్టర్‌లో వెల్లడించారు. ఇటీవల కరోనా నిర్ధారణ కాగా, చెన్నై ఆసుపత్రిలో చికిత్స పొందుతూ తుది శ్వాస విడిచారు. ఆయన మొజి, అఘగియా తీయే, కందనాల్‌ ముదల్‌ వంటి చిత్రాలకు పనిచేశారు. టూరింగ్‌ టాకీస్‌ అనే యూట్యూబ్‌ చానల్‌లో సినిమా రివ్యూయర్‌గా వ్యవహరించారు. ఆయన మృతి పట్ల ప్రకాష్‌రాజ్‌, నటి రాధిక శరత్‌ కుమార్‌ వంటి ప్రముఖులు తీవ్ర దిగ్భ్రాంతిని వ్యక్తం చేశారు.
